Meloni bildirib ki, İtaliyanın xarici siyasəti dəyişməyəcək və Roma son 80 ildə olduğu kimi, ABŞ və Avropa arasında möhkəm əlaqələrin qorunmasını əsas prioritet sayacaq.

“Mən İtaliyanın bundan sonra xarici siyasətinin necə olacağı barədə çoxsaylı şərhlər və ehtimallar oxuyuram. O, son 80 ildə necə olubsa, elə də olacaq. Yəni mən ABŞ və Avropa arasında möhkəm münasibətlərin qorunmasının nə qədər vacib olduğuna dair fikrimi dəyişmirəm. Aydındır ki, hər şey məhz bu münasibətlər üzərində dayanır. Bu, bizim gücümüzün nəhəng mənbəyidir”.

Meloni Livanla İsrail arasında mümkün birbaşa danışıqlara da toxunub:

“Livan prezidenti İsraillə birbaşa danışıqlara hazır olduğunu bildirməklə böyük cəsarət göstərib”.

İtaliya baş naziri İranın Hörmüz boğazından keçid üçün rüsum almaq niyyətini qəbuledilməz adlandırıb:

“Əgər biz İrana Hörmüz boğazında rüsum almağa imkan versək, hər bir strateji ticarət marşrutunun silaha çevrildiyi bir dünyaya daxil olarıq.

Bu isə bizim sadəcə olaraq yol verə bilməyəcəyimiz bir şeydir”.

Meloni İranın nüvə proqramı ilə bağlı da sərt mövqe ifadə edib:

“Biz sadəcə olaraq ayətullah rejiminin nüvə silahı, nüvə başlıqları əldə etməsinə imkan verə bilmərik. Xüsusilə də nəzərə alsaq ki, onun artıq uzaqmənzilli raketləri var və o, buna malik olduğunu açıq şəkildə nümayiş etdirib.

Mən təkcə ABŞ-dan, yaxud İran sərhədlərinə daha yaxın ölkələrdən və ya İsraildən danışmıram.

Biz buna imkan verə bilmərik. Biz bunu özümüzə rəva görə bilmərik”.

Trampla mübahisəsi barədə danışan Meloni xarici siyasət kursunu dəyişmədiyini vurğulayıb:

“Mən fikrimi dəyişmirəm, tamam? Mən fikrimi dəyişmirəm.

Bütün bu təhlilləri oxuyuram, orada soruşurlar:

“İndi İtaliyanın xarici siyasəti necə olacaq?”.

O, son 80 ildə necə olubsa, elə də olacaq.

Mən ABŞ və Avropa arasında münasibətlərin güclü saxlanmasının nə qədər vacib olduğuna dair baxışımı dəyişməmişəm”.

Meloni bildirib ki, İtaliya-ABŞ münasibətləri sosial şəbəkələrdəki mübahisələrdən asılı olmayacaq qədər dərin tarixə malikdir:

“Bunlar o qədər uzun və möhkəm əməkdaşlıq tarixi üzərində qurulan münasibətlərdir ki, sosial şəbəkədəki bir mübahisəyə görə sadəcə yoxa çıxmır və ya yenidən müəyyənləşdirilmir.

Bu münasibətlər müəyyən bir anda ABŞ-da, İtaliyada və ya hər hansı başqa Avropa ölkəsində kimin hakimiyyətdə olmasından asılı olaraq başlamır və bitmir.

Biz xarici siyasəti onun tələb etdiyi dərinliyə qaytarmalıyıq, çünki bəzən biz bunu elə müzakirə edirik ki, sanki söhbət “Temptation Island”ın bir mövsümündən gedir.

Bunu internetdə gördüyüm memlərə istinadən deyirəm, amma xarici siyasət bundan qat-qat mürəkkəbdir”.

Meloni Tramp ilə yaranan gərginliyi daha da böyütmək istəmədiyini bildirib:

“Mən həqiqətən təəccübləndim və təəccübləndiyimi deyəndə tam səmimi idim.

Əlbəttə, dövriyyədə olan müxtəlif şərhləri oxumuşam. Onların bəziləri guya viral olmuş videolarla bağlıdır və həmin videolarda mənim davranışım, barmaqla göstərmək məsələsindən asılı olmayaraq, bir qədər sərt görünə bilərdi.

Mən həmçinin bunun İranla danışıqlardakı irəliləyişdən diqqəti yayındırmaq və bunun əvəzinə diqqəti NATO daxilindəki çətinliklərə yönəltmək cəhdi ola biləcəyinə dair versiyaları da oxumuşam.

Gördüyünüz kimi, son saatlarda məsələ artıq İtaliya çərçivəsindən çıxaraq başqa ölkələri də əhatə etməyə başlayıb.

Bu izahlardan hansının doğru olub-olmadığını bilmirəm.

Mən artıq demişəm və təkrar edirəm ki, bu mübahisəni daha da qızışdırmaq niyyətində deyiləm.

visiontv.az