Çərşənbə axşamı Rusiyanın xarici işlər naziri Lavrov bəyan edib ki, ABŞ müharibədə “obyektiv vasitəçi rolundan açıq şəkildə uzaqlaşır” və Trampın ötən il Moskvanın mövqeyinə daha yaxın olan öz bəyanatlarını “unudub”.

Qapalı müzakirələrdən xəbərdar olan iki mənbənin sözlərinə görə isə, G7 sammiti zamanı Tramp Ukraynanın Rusiya ərazisinin dərinliklərindəki hədəflərə zərbələr endirməsi kampaniyasından “çox təsirlənib və ruhlanıb”.

 Bu zərbələr ABŞ kəşfiyyatının dəstəyi ilə də həyata keçirilir. Qərbli müttəfiqlər Vaşinqtonu bu dəstəyi davam etdirməyə çağırıblar.

Lavrovun sözləri Rusiyada ABŞ-ın Putinin işğalını Moskva üçün əlverişli şərtlərlə başa çatdırmağa kömək etməməsi səbəbindən artan narazılığın siqnalı olub.

Lavrovun dediyinə görə, Rusiya işğalın məqsədlərinə nail olmağa fokuslanacaq, çünki “ABŞ-ın dürüst vasitəçi ola biləcəyinə dair bütün ümidlər çoxdan puça çıxıb”.

Hələ mart ayında ABŞ kəşfiyyat xidmətləri Rusiyanın müharibədə üstünlüyə malik olduğunu hesab edirdi. Lakin son aylarda avropalı diplomatlar bildiriblər ki, amerikalı rəsmilər qiymətləndirmələrini dəyişiblər və artıq Moskvanın qalib gəldiyini düşünmürlər.

 Ukraynanın yüksək vəzifəli rəsmiləri Financial Times-a bildiriblər ki, Trampın Kiyevə dəstəyi gücləndirməyə daha çox meyil etdiyinə və ola bilsin, müharibəni dayandırması üçün Rusiyaya təzyiq göstərəcəyinə dair əlamətlər görürlər.

Bununla belə, onlar ABŞ prezidentinin ardıcıllığına şübhə ilə yanaşırlar və qeyd edirlər ki, Tramp əvvəllər də yerinə yetirmədiyi vədlər verib.

Buna baxmayaraq, Zelenski, Tramp və digər liderlərin görüşlərindən sonra Ukrayna tərəfi Patriot raketlərinin önləyiciləri və Qərb silahlarının lisenziyalaşdırılması məsələsində irəliləyişi ehtiyatlı nikbinliklə qiymətləndirir.

Ukraynalı rəsmilərdən biri bildirib ki, hər şey detalların razılaşdırılması üçün Ukrayna Milli Təhlükəsizlik və Müdafiə Şurasının katibi Rüstəm Umerovla amerikalı rəsmi şəxslər arasında aparılacaq növbəti danışıqlardan asılı olacaq.

Rəsminin sözlərinə görə, Zelenski və Tramp Evian-le-Ben şəhərində şam yeməyi zamanı uzun söhbət ediblər. Tramp Zelenskiyə deyib ki, Kiyevin son “hərbi nəticələrindən” təsirlənib.

Görüşdən sonra isə Zelenski bildirib ki, Tramp və Rubio Patriot önləyiciləri üçün lisenziyalar məsələsinə “ilk dəfə müsbət reaksiya veriblər”.

 “Hamı razılaşır ki, biz indi Patriot sistemləri üçün raket istehsalına başlamaqdan ötrü lazım olan bütün texniki imkanlara sahibik. İndi yalnız prezident Trampın şəxsi razılığı lazımdır”.

Bundan əvvəl Putin mühüm sammitlər ərəfəsində Trampa zəng edərək Ukrayna və Avropa İttifaqının ona təsir göstərmək cəhdlərini pozmağa çalışırdı. Lakin Rusiya prezidentinin sammitdən bir neçə gün əvvəl Trampın doğum günü münasibətilə etdiyi zəngin bu dəfə xüsusi təsir göstərmədiyi görünür.

Avropa paytaxtları Trampın münaqişəyə dair baxışlarında açıq şəkildə müşahidə olunan dəyişikliklərə, xüsusilə də Rusiyanın qələbəsinin qaçılmaz olmadığını anlamasına reaksiya veriblər.

 “Ukrayna lazımi təchizatı alanda real əməliyyat nəticələri əldə etməyə qadirdir”, - deyə NATO-nun yüksək rütbəli hərbi zabitlərindən biri bildirib. “Rusiya müdafiə xətləri keçilməz deyil”.

Trampın proqnozlaşdırılması çətin olan yanaşması, eləcə də Moskvada bəzilərinin Uitkoff və Kuşnerin həddindən artıq sərbəst diplomatiyası hesab etdiyi amil Rusiya tərəfinin Trampın Putinin işğalla bağlı maksimalist məqsədlərinə nail olmasına kömək edəcəyinə inamını itirməsinə gətirib çıxarıb, - FT mənbələri bildiriblər.

visiontv.az