İsrail hökuməti OpenAI şirkətinin ChatGPT və Anthropic şirkətinin Claude çatbotları da daxil olmaqla, süni intellekt sistemlərini planlı şəkildə yönləndirmək üçün Bred Parskeylin rəhbərlik etdiyi layihəyə 46,5 milyon dollar ayırıb.

Drop Site-ın məlumatına görə, Parskeyl kampaniyanı Clock Tower X LLC adlı rəqəmsal şirkəti vasitəsilə həyata keçirir. O, əvvəlcə GPT söhbətlərində müəyyən çərçivələrin formalaşdırılması üçün saytlar və xüsusi məzmun hazırlamağı planlaşdırıb. Sonradan müqavilənin dəyəri ayda 4,5 milyon dollara çatdırılıb.

Əməliyyat insan oxucuları cəlb etməkdən daha çox böyük dil modellərinə təsir göstərmək üçün hazırlanmış yüzlərlə strukturlaşdırılmış məqalə dərc edən 10 əsas sayta söykənir.

Şəbəkə adi xəbər auditoriyasını deyil, Common Crawl məlumat bazasını hədəfə alır. Bu qeyri-kommersiya internet arxivi GPT-3 modelindəki tokenlərin təxminən 80 faizinin təlim məlumatlarını təmin edir və böyük kommersiya süni intellekt alətlərinin əsas mənbələrindən biri sayılır.

Yanvar-iyun aylarında Common Crawl Clock Tower X saytlarını 912 dəfə indeksləyib. Məzmunun arxivləşdirilmə göstəricisi 85 faizə çatıb və bu nəticə digər xarici təsir əməliyyatlarını xeyli qabaqlayıb.

Saytlar strukturlaşdırılmış mətn, aydın bəndlər və nüfuzlu mənbələrdən istifadə etməklə alqoritmlərin mübahisəli geosiyasi mövzularda “balanslı” materiallara üstünlük verməsindən yararlanırlar.

Market Brew şirkətinin texniki direktoru Skott Stauffer bildirib ki, məlumatın quruluşu modellərin onu necə indeksləşdirəcəyini müəyyən edir. Onun sözlərinə görə, məlumatı elə strukturlaşdırmaq və mənbələndirmək mümkündür ki, istifadəçi sual verəndə sistem həmin məzmunu daha çox seçsin.

Sınaqlar göstərib ki, Microsoft Copilot, Google Gemini və Perplexity kimi sistemlər Parskeylin şəbəkəsinə dəfələrlə istinad edir, lakin bu platformaların xarici hökumət tərəfindən maliyyələşdirildiyini qeyd etmirlər.

Saytların sonunda Xarici Agentlərin Qeydiyyatı Aktına uyğun açıqlamalar yerləşdirilsə də, çatbotlar cavablarında bu məlumatı çox vaxt istifadəçilərə çatdırmırlar.

Layihə İsrailin xarici lobbiçilik xərclərinin artmasının bir hissəsidir. Ölkənin 2023-cü ildən bəri 100 milyon dollardan çox vəsait xərclədiyi və 2026-cı ildə FARA çərçivəsində ən böyük maliyyə ayıran tərəfə çevriləcəyi gözlənilir.

Bununla belə, Təl-Əvivdə layihənin nəticələrindən narazılıq yaranıb. Müqavilə ilə tanış olan israilli məmur bildirib: “Bred Parskeylə qəzəbliyik. Ona çox pul ödəmişik. Bəs o nə edib? Vəziyyət yalnız daha da pisləşib”.

visiontv.az