Bağla
Axtarış sözünü daxil edin
Bir dəfə Heminquey mərc etmişdi ki, hər bir oxucuya təsir edəcək cəmi 4 sözdən ibarət hekayə yaza bilər. Yazıçı mərci uda bilmişdi: “Uşaq ayaqqabıları satılır. "Geyinilməyib" («For sale: baby shoes, never used»)
Frederik Braun indiyə qədər yazılmış hekayələr içərisində ən qısa və qorxulu hekayəsini yazmışdı:
“Yer üzündəki sonuncu insan otaqda oturmuşdu. Qapı döyüldü...”
Amerika yazıçısı O’Henri hekayənin ənənəvi komponentlərini – giriş, kulminasiya və nəticəni özündə cəmləşdirən ən qısa hekayə müsabiqəsində qalib gəlmişdi:
“Sürücü siqareti yandırdı və yanacaq çəninin üstünə əyildi ki, çəndə nə qədər benzin qaldığını görsün. Mərhumun iyirmi üç yaşı var idi”.
Robert Tompkins "Həqiqət axtarışında":
Nəhayət, onun axtarışları bu ucqar, tənha kənddə başa çatdı. Köhnə, uçuq-sökük daxmada odun qarşısında Həqiqət oturmuşdu.
O, belə qoca və çirkin qadın görməmişdi.
- Siz Həqiqətsiz?
Bürüşmüş küpəgirən qarı təntənəli şəkildə başını tərpətdi.
- Deyin görək, dünyaya nə deməliyəm? Hansı xəbəri çatdırım?
Qarı oda tüpürdü və cavab verdi:
- Onlara de ki, mən gəncəm və gözələm!
Alan E. Mayer "Bəxtigətirməzlik”
Bütün bədənimi bürümüş şiddətli ağrıdan oyandım. Gözlərimi açdım və çarpayımın yanında bir tibb bacısının dayandığını gördüm.
- Cənab Fujima, – o, dedi, - sizin bəxtiniz gətirib, iki gün əvvəl bombardman edilən Xirosimadan sağ çıxa bilmisiniz. İndi xəstəxanadasınız və sizi heç bir təhlükə gözləmir.
O qədər zəifləmişdim ki, güclə soruşdum:
- Mən haradayam?
- Naqasakidə, - o, cavab verdi.
Viktor Hüqo “Səfillər” romanının əlyazmasını naşirə göndərəndə müşayiət məktubunda yalnız bircə işarə qoymuşdu:
"?"
Cavab sualdan uzun deyildi:
“!”
Spartalılar fikirlərini həmişə qısa ifadə ediblər. Bunun klassik nümunəsi Makedoniya kralı II Filipin məktubuna verilmiş cavabdır:
“Mən sizə dərhal təslim olmağı məsləhət görürəm, çünki əgər mənim ordum sizin torpaqlarınıza girsə, bağlarınızı dağıdacağam, camaatınızı əsir götürəcəm, şəhərinizi isə viran qoyacam”.
Spartalı eforlar ultimatuma bircə sözlə cavab vermişdilər: "Əgər".
Arzu Qazıyeva
visiontv.az
