Bağla
Axtarış sözünü daxil edin
Beynəlxalq Miqrasiya Təşkilatının Azərbaycan nümayəndəliyinin rəhbəri Vladimir Qyorqiev, Niderlandın ölkəmizdəki səfiri Onno Kerves Gəncə şəhərinə səfərləri zamanı şəhər icra hakimiyyətinin başçısı Niyazi Bayramov ilə görüş keçirmişlər.
Visiontv.az-ın verdiyi xəbərə görə, görüş zamanı qonaqlar BMqT-nin Niderland səfirliyinin maliyyə dəstəyi ilə BMqT-nin həyata keçirdiyi "Azərbaycanda İnsan Alveri Qurbanlarına birbaşa yardım göstərilməsi və sığınacaq yerlərində yaşayış şəraitinin yaxşılaşdırılması vasitəsilə onların ehtiyaclarının həll edilməsi" layihəsi haqda ətraflı məlumat vermişlər.
Bu layihənin əsas məqsədi insan alveri qurbanlarının və insan alverinin potensial qurbanlarının təhlükəsiz və keyfiyyətli mühafizə imkanlarının artırılmasını təmin etməklə Azərbaycanda insan alveri qurbanlarının müdafiəsini yaxılaşdırmaqdır. Bununla bağlı paytaxtla yanaşı bölgələrdə də layihə çərçivəsində bir sıra tədbirlər keçirilir. Gəncədə fəaliyyət göstərən “Təmas” Regional İctimai Birliyi ilə birgə əməkdaşlıq etdiklərini bildirən qonaqlar bu istiqamətdə aparılan işdə öz dəstəyini əsirgəmədiyi üçün Niyazi Bayramova təşəkkürünü bildirdilər.
Qeyd edək ki, layihə çərçivəsində BMqT-nın Azərbaycan nümayəndəliyi Gəncə şəhərində “Təmas” Regional İnkişaf İctimai Birliyinə aid 20 nəfər insan alveri qurbanları və potensial zərərçəkənlər üçün "Əsas bizness bacarıqları" təlimi keçirmişdir. Təlimin ardından iştirakçılar öz biznes planlarını hazırlayaraq qiymətləndirilmək üçün təqdim etmişlər. Bundan sonra təlimi başa vuran iştirakçılara fərdi ehtiyaclara uyğun hazırlanmış qrantlar verilməsinə başlanılmışdır. Bu qrantlardan artıq yarlanaraq öz biznesləri üçün avadanlıqlar əldə edən bəzi benefisiarlarla görüşən qonaqlar onlara işlərində uğurlar arzuladılar.
Ümumilikdə BMqT-nin həyata keçirdiyi layihə birbaşa yardım göstərməklə və sığınacaqlarda yaşayış şəraitinin yaxşılaşdırılması vasitəsilə insan alveri qurbanlarının və insan alveri təhlükəsi altında olan şəxslərin müdafiəsini təkmilləşdirməklə insan alverinə qarşı mübarizə sahəsində Azərbaycan hökümətinə və vətəndaş cəmiyyətinə kömək etmək məqsədini daşıyır.
