Bağla
Axtarış sözünü daxil edin
Ağ Evin aparat rəhbəri Syuzan Uayls amerikalı Vanity Fair jurnalına verdiyi silsilə müsahibələrdə gözlənilmədən açıq danışıb. Digər məsələlərlə yanaşı, o bildirib ki, ABŞ prezidenti Donald Trampın “alkoqolik şəxsiyyəti” var və bu tip xüsusiyyətlər spirtli içki qəbul etdikdə daha da güclənir.
Uayls deyib ki, alkoqolik atanın yanında böyüyüb və bu cür “aydın ifadə olunmuş şəxsiyyətləri” yaxşı tanıyır. O, Tramp və onun ətrafı barədə elə qiymətləndirmələr verib ki, sanki vəzifəsini itirməkdən çəkinmir. Ən diqqətçəkən fikirlər bunlardır:
Tramp qisas hissi ilə hərəkət edir. Onun ikinci prezidentlik dövründəki bir çox addımları intiqam istəyi ilə diktə olunur. “Məncə, o, səhər oyanıb qisas haqqında düşünmür. Amma imkan yaranan kimi, ondan istifadə edir”, — deyə Uayls bildirir.
Tramp məsləhətləri nəzərə almır — o cümlədən deportasiyalar, gömrük rüsumları və əfvlərlə bağlı. Məsələn, Uayls deyir ki, o, Trampı iri gömrük tariflərinin elanını təxirə salmağa razı sala bilməyib, halbuki bu məsələ ilə bağlı onun müşavirləri arasında “ciddi fikir ayrılıqları” var idi.
“O, elə bir inamla hərəkət edir ki, guya əldə edə bilməyəcəyi heç nə yoxdur. Heç nə, tamamilə heç nə”, — deyə müşavir onun xarakterini təsvir edir.
Uayls vitse-prezident Cey Di Vens haqqında da xoş olmayan fikirlər səsləndirib. Onun sözlərinə görə, Vens “artıq on ildən çoxdur ki, konspiroloqdur”, Trampın tənqidçisindən onun sadiq müttəfiqinə çevrilməsi isə “tamamilə siyasi motivli” olub.
Texnologiya milyarderi və Trampın keçmiş müttəfiqi İlon Mask barədə Uayls deyir ki, o, ketamin istifadəçisi kimi tanınır və “dahilərdə tez-tez rast gəlinən qəribə bir çudakdır”.
Sözlər kontekstdən çıxarılıb?
Müsahibə dərc edildikdən sonra Uayls X sosial şəbəkəsində Vanity Fair-ə qarşı gözlənilməz tənqidlə çıxış edib və sözlərinin kontekstdən çıxarıldığını bildirib:
“Bu gün səhər dərc olunan məqalə mənə, ən yaxşı prezidentə, Ağ Evin ən yaxşı əməkdaşlarına və tarixdəki ən yaxşı kabinetə qarşı yalançı sifarişli materialdır. Vacib kontekstlər nəzərə alınmayıb, mənim və digərlərinin komanda və prezident haqqında dediklərinin böyük hissəsi ixtisar edilib. Oxuduqdan sonra belə qənaətə gəldim ki, məqsəd prezident və komandamız barədə ardıcıl olaraq xaotik və mənfi obraz yaratmaqdır”, — deyə o yazıb.
Məqaləyə Ağ Evin mətbuat katibi Kerolayn Levitt də reaksiya verib: Trampın “Syuzidən daha vacib və daha sadiq müşaviri yoxdur” və bütün hökumət “onun müdrik rəhbərliyinə görə minnətdar olaraq” Uaylsın arxasında yekdilliklə dayanır.
visiontv.az
