Mollalar bu yolla Güney Azərbaycanla Türkiyə arasında ayırıcı zolaq yaratmaq istəyirlər. Məqsəd isə Türkiyənin gələcəkdə Güney Azərbaycana qurudan dəstəyini tam olaraq əngəlləmək və üstəgəl PJAK-da birləşən kürd separatçılarının timsalında Türkiyə üçün əlavə terror ocağı yaratmaqdır.

Bu arada onu da qeyd edim ki, mollalar ikibaşlı oyun oynayırlar. Bir yandan kürdləri azərbaycanlılara qarşı qızışdırır və Urmiyanın Kürdistan olduğu iddiasını tirajlamağa, yaymağa çalışırlar, o biri yandan isə İran hökuməti deyir ki, etnik problem təhlükəlidir.

Martın 18-də kürdlərin Urmu şəhərində bayram şənliyini siyasi mitinqə çevirib, "Urmiya Kürdistandır" şüarını səsləndirmələrinə cavab olaraq Azərbaycan türklərinin izdihamlı mitinqindən iki gün sonra özünün X hesabında etnik məsələyə toxunan İranın irşad naziri Seyid Abbas Salehi heç bir ad çəkmədən, konkret hədəf göstərmədən bildirib ki, "İranda etnik və dini faylar təhrik edilməməlidir, onlar tezliklə əriyə və dağıdıcı alova çevrilə bilər. Birliyi pozan hər bir səs, hərəkat indi daha qorxulu ola bilər. Ona görə də, ölkənin indiki durumunda əvvəlkindən də diqqətli olmalıyıq".

Seyid Abbas Salehinin bu paylaşımından belə çıxır ki, kürd separatçılarının vasitəsilə Güney azərbaycanlıların sıxışdırılması və ərazi iddialarının ortaya atılması bilavasitə İranın ali dini lideri Xameneinin ofisinin və SEPAH-ın işidir.

Göründüyü kimi Xameneinin və SEPAH-ın bu addımı gələcəyə hesablanıb. Onlar Güney Azərbaycanın ayrılmaq, öz müstəqilliyini bəyan etmək təşəbbüsünü indidən neytrallaşdırmaq üçün hərəkətə keçiblər. Molla rejimi öz sərhədlərinin böyük bir hissəsinin yaxın gələcəkdə üç türk dövləti - Azərbaycan Respublikası, Güney Azərbaycan Cümhuriyyəti və Türkiyə Cümhuriyyəti tərəfindən əhatələnəcəyi perspektivini heç cürə qəbul edə bilmir. Ona görə də kürdləri Urmiyaya köçürməklə önləyici tədbirlər görməyə çalışır.

Azərbaycan və Türkiyə də buna cavab olaraq önləyici tədbirlər görməlidir. Seyrçi qalmaq, Güney Azərbaycanın nə vaxtsa öz gücünə azad olacağını oturub gözləmək olmaz. Biz güneylilərin milli azadlıq hərəkatını bütün mümkün vasitələrlə dəstəkləməliyik. Təşəbbüsü ələ almalıyıq. Mollaları qabaqlamalıyıq. Bu məsələdə əsla gecikmək olmaz.

Mollalar zatən etnik problemin İran dövlətinin varlığı üçün ən böyük təhlükə mənbəyi olduğunu yaxşı başa düşürlər. Lakin buna rəğmən Urmiyada kürd-türk konfliktini süni surətdə qızışdırmağa davam edirlər. Biz də molla rejiminin bu silahını onun özünə qarşı çevirməliyik.

P.S.

"Xalqlar həbsxanası"na çevrilən bütün digər imperiyalar kimi İran da ilk növbədə məhz etnik qarşıdurmalar nəticəsində dağılacaq.

Bəybala Mirzəyev

visiontv.az