Şirlərin gər düşərsə bir-birilə davası,

Çaqqalların arada olacaqdır faydası.

                           ***

Yolların uzunu yox, enilə gedilsəydi,

Naşükürlər yenə də şikayət eyləyərdi.

                           ***

Bir gün istəsən əgər yağ atasan ocağa,

Onda gərək özün də çəkiləsən qırağa.

                           ***

Örtsə qapı üzünə, əgər qapını açan,

Ona da qapı bağlar, ona da qapı açan.

                           ***

Sevdalılar həyatı yaşasaydılar təkrar,

Qara sevda yaşayan yenə sevdiyin arar.

                           ***

İnsanı razı salmaq olmasaydı gər müşkül,

O, Cənnəti tərk edib olmazdı ocaqda kül.

                            ***

At buğdanı zəmiyə, qoy göyərsin gələn il,

Qış dərmandır, qar yorğan torpaq altda dənə, bil.

                               ***

O kəsin qar altında varsa buğda zəmisi,

Özünün yorğan altda buxar verər dərisi.

                               ***

Əyin istər geydiyin, qarın istər yediyin,

Kimi çeynər dediyin, kim udar eşitdiyin.

                                ***

Daş atana daş atma, onu elə başından,

Yoxsa səni edəcək huyundan, həm yolundan.

                                 ***

Gözəl gülün ətiri xoş gəlməsə bir kəsə,

Demək ki, duymaq üçün gəlməmişdir həvəsə.

                                 ***

Qəlb istəməsə yemək, ona zülüm çeynəmək,

Həvəslə yeyən kəslər həvəslə çeynəyəcək.

                                 ***

Ruhunla gər eynisə bütün gördüyün işlər,

O işlər bütünlükdə fayda da verəcəklər.

                                  ***

Ağzın şirindirsə gər, bal süzülür dodaqdan,

Ağzı acı olanlar alovlanır cınqıdan.

                                  ***

Bir az dözüm tapmasan hövsələni yeməyə,

Sonradan başlayarsan, peşmanlığın çəkməyə.

                                    ***

Öz qabında olmazsa əgər mərifət, səhman,

Özgədən öyrənsən də, çalış unutmayasan.

                                ***

Divarının bir azın tiksən bir bənna ilə,

İşindən məlum olar divar hördün kim ilə.

                                ***

Əl uzada bilsəydi insan öz taleyinə,

Bəlkə də, başlayardı göylə müharibəyə.

Evlərin damındaca şahid olub dərd-qəmə,

Quru qamış başladı, neytək inildəməyə.

                               ***

Baxarkən məzardakı yatanlara daş-torpaq,

Torpaq üzü qaraldı, daş da çöndü oldu daş.

                               ***

Olsan da çox-çox uca öz-özünün gözündə,

Onun yarısı qədər uca ol el gözündə.

                               ***

Başla ağılın olmur, öz adından aralı,

Birinin etdiyindən hər ikisi sayalı.

                                ***

Çıxar onu bazara, yoxdur "həsrət" dəyəri,

Nə alan var, nə satan, çün yoxudur bəhəri.

                                 ***

Saatlar dillənsəydi əgər sənin yerinə,

Keçirdiyin boş vaxtı, heç yazmazdı ömrünə.

                                 ***

Tər qönçətək aləmi gər bürüyərsə ətrin,

O kəsə xoş gələcək, kim istəyirsə xətrin.

                                  ***

Göz gördü, könül sevdi, ağıl adı çəkən yox,

Ağılı kim unutsa, bəla çəkər başı çox...

                                 ***

Qudurğanlıq havası burunu qaldırınca,

Tuluq özü partlayar havası çox olunca.

                                  ***

Bir azca boş yapışsan sevdiyinin əlindən,

Kimsə gəlib alacaq sevdiyini, bil, səndən.

                                   ***

Ömür də bir badədir, çəksən əgər başına,

Qalan damcıları da dönəcək göz yaşına.

                                  ***

İki qəlb arasında körpüyə bənzər dostluq,

Körpü möhkəm olmasa, arada olur boşluq.

                                    ***

Hər bir münasibətdə arada pərdə olur,

O pərdəni qaldırsan, ora nifaq soxulur.

                               ***

Baş ucunda dayansa əgər sənə yaxının,

Başını uzaq saxla, özün olsan da yaxın.

                                ***

Yaş arpa kif atsa gər, əkən peşmanlıq çəkər,

Əməlin düşünməyən sonra göz yaşı tökər.

                                ***

Yorğun-yorğun iş görsən, iş də səndən yorular,

İşi həvəslə görsən, o da səni ucaldar.

                               ***

Baş olmasa dumanlı, hər şey apaydın olar,

Dumanlı başların da başı bəlalı olar.

                              ***

Budur dünya bazarı, qıfıl var, yox açarı,

Yüzün verir birinə, yada salmır naçarı.

                               ***

Gözləsən ədəb-ərkan, tərk etməzsən sükanı,

Unutsan ədəb-ərkan, dar edərsən məkanı.

                                ***

Kim ki bir gün duyar eşqin o gözəl ətrin,

Qəlb yağışına açacaq kirpik də öz çətrin.

                                ***

Etmə giley-güzarı, bir gün gələr güzarı,

Bəxtinə Günəş doğan, unudar ağrıları.

                                ***

Kimi vurdu korluğa, kimi vurdu karlığa,

Ona görə nadanlar başladı ağalığa.

                                ***

Cibindəki pulunsa hamını sənə çəkən,

Savabını qazan sən, bu fürsətin var ikən.

                                ***

İt də möhkəm hürüyər, səni tənha görübsə,

Uşaq boynu bükükdür, ata-ana ölübsə.

                                ***

Yan alıbdı sahilə, qayıtmaz o fəxrilə,

Dərya kənarındakı bələd olub sahilə.

                                ***

Evində hörmət-izzət görsəydi əgər qoca,

Qalmaz nəzərdən kənar, dam güncündə bir qoca

                                 ***

Bu həyat çeşməsindən kim içərsə beş damcı,

Hər damcının yerinə fələk vurar yüz qamçı.

                                 ***

Görsən, kimisə gözü yorğun, fikiri dalğın,

Bil ki, fələk pozubdur həyatında növrağın.

                                  ***

Yağmaladı yalanlar, tozanaqdır qalanlar,

Bəzən yüz sifətə düşür zirvəyə qalxanlar.

                                 ***

Ömür-gün vəfasızdır, getdisə, geri dönmür,

Səni ağuşuna alıb birgə burdan köçür.

                               ***

Ağıla görə bölünsə var-dövlət əzəldən,

Var- dövləti gedərdi çoxlarının əlindən.

                                ***

Qoy elmin qorxutmasın daş-çınqıllı yolları,

Elmsiz ağıllıların boy atmır ağılları.

                               ***

Xoşdur insan oğluna az işləyə, çox yeyə,

Görmədim çox yeyənlər nə vaxtsa doydum deyə.

                                  ***

Kim düşündü var-dövlət, həm də gətirər hörmət,

Düşünmədi, tək təmiz adla qazanır hörmət.

                                   ***

Kifayət eyləmədi nadanlara var-dövlət,

Çün var-dövlətə görə yaltaqlar etdi hörmət.

                                   ***

Kimlər ki kasıb yatar, səhər varlı oyanar,

O ya fərqinə varar, ya da ki yolun azar.

                                 ***

Bu dünya qazanından kimin ki payı çoxdur,

Kimə də yeməkdən çox, şanı-şöhrəti xoşdur.

                                   ***

Soruşma peşəsini bir kəndli əkinçidən,

Əməyinin izləri bəllidir əllərindən.

Xalidə Hicran

visiontv.az