Bağla
Axtarış sözünü daxil edin
Ukrayna Rusiyanın “kölgə donanması”na qarşı hücumların coğrafiyasını genişləndirib və ilk dəfə Aralıq dənizində zərbə endirib. Reuters agentliyinin SBU-ya (Ukrayna Təhlükəsizlik Xidməti) istinadən yazdığına görə, Ukrayna xüsusi xidmətləri Oman bayrağı altında üzən və Kritin cənub-qərbində beynəlxalq sularda olan Qendil tankerinə hücum edib. SBU bu əməliyyatı “yeni və misilsiz” adlandırıb.
BILD nəşrinin məlumatına görə, əvvəlcə tankerin yanına Ukrayna gəmisi yaxınlaşıb, oradan SBU-nun “Alfa” xüsusi təyinatlı bölməsi kəşfiyyat və zərbə dronlarını buraxıb. SBU-nun yayımladığı kadrlarda gəminin göyərtəsində partlayış baş verdiyi görünür. Tanker Aİ və Böyük Britaniyanın sanksiyaları altındadır və Kiyevin versiyasına görə, Rusiya tərəfindən neft məhdudiyyətlərindən yan keçmək və müharibəni maliyyələşdirmək üçün istifadə olunub.
SBU vurğulayıb ki, hücum zamanı gəmi boş olub və neft daşımayıb, buna görə də “zərbə regionda ekoloji vəziyyət üçün təhlükə yaratmayıb”. SBU-nun məlumatına əsasən, tanker kritik zədələr alıb və artıq təyinatı üzrə istifadə oluna bilməz. Kiyevdə bu cür gəmilər “tamamilə legitim hədəflər” adlandırılır və hücumların coğrafiyasının genişləndiriləcəyinə işarə edilir.
İndiyədək Rusiyanın “kölgə donanması”na qarşı əsas hücumlar Qara dənizdə Sea Baby dəniz dronlarından istifadə etməklə həyata keçirilirdi. Bloomberg qeyd edir ki, bir sıra zərbələrdən sonra Rusiya neft tankerləri hücum riskini azaltmaq üçün Gürcüstan və Türkiyə sahilləri boyunca dolama marşrutla hərəkət etməyə başlayıblar. Bu marşrut təxminən 560 kilometr daha uzundur və yolu demək olar ki, 70% artırır.
visiontv.az
