Bağla
Axtarış sözünü daxil edin
Tehran birjası uzun fasilədən sonra çərşənbə axşamı yenidən açılıb.
Lakin bazarın ilk günü normal fəaliyyətə qayıdışdan daha çox satış növbəsi, investor ehtiyatlılığı və müharibədən sonrakı qeyri-müəyyənliyin davam etdiyini göstərib.
Bazarın açılmasına baxmayaraq, ticarət tam şəkildə bərpa olunmayıb. “Mehr” agentliyi Tehran Fond Birjası təşkilatına istinadən xəbər verir ki, bazar dəyərinin təxminən 35 faizini təşkil edən 42 iri səhmin ticarəti hələ də dayandırılmış durumdadır. Bu səhmlər müharibə nəticəsində zərər görən və ya zədələnmiş şirkətlərdən asılı olan əməliyyat səbəblərinə görə bağlanıb. Onların bir hissəsi neft-kimya, əsas metallurgiya, enerji və investisiya şirkətləri qruplarına daxildir.
Ticarətin ilk dəqiqələrində satış çoxluğu sürətlə bazara üstün gəlib. Bazardan gələn operativ məlumatlara görə, güclü satış sıraları formalaşıb və mənfi səhmlər üstünlük təşkil edib. Alış sifarişlərinin həcmi təxminən 1575 milyard tümən, satış sıraları isə təxminən 10 min 300 milyard tümən olaraq qeydə alınıb. Bu, bir çox investorun bazara qayıdış günü satışı seçdiyini göstərir.
Tehran birjasının açılması göstərir ki, 80 günlük fasilə riskləri aradan qaldırmayıb, sadəcə onları açılış gününə qədər təxirə salıb. 42 iri səhmin hələ də bağlı qalması, güclü satış dalğası, məhdud sayda müsbət səhmlər və investorların ehtiyatlı davranışı bazarın hələ də şirkətlərin zərərləri, gəlirlilik, müharibənin gedişi və dövlət dəstək siyasətləri ilə bağlı aydın mənzərəyə malik olmadığını göstərir.
visiontv.az
.png)
