Bağla
Axtarış sözünü daxil edin
Almaniya hökuməti 2026-cı il üzrə iqtisadi artım proqnozunu kəskin şəkildə aşağı salıb. Yanvarda 1 faiz gözlənilən artım indi cəmi 0,5 faiz səviyyəsində qiymətləndirilir. Səbəb isə aydındır: İran ətrafında müharibənin dərinləşməsi enerji daşıyıcılarını bahalaşdırır və bu dalğa artıq birbaşa Almaniya iqtisadiyyatına təsir göstərir.
Yeni proqnozu Berlində təqdim edən Almaniyanın iqtisadiyyat naziri Katerina Rayx bununla faktiki olaraq Avropa İttifaqının ən böyük iqtisadiyyatının sürətli toparlanacağına dair ümidləri də zəiflətmiş oldu. Enerji qiymətlərində artım sənaye üçün xərcləri böyüdür, bazarda risk hissini artırır və onsuz da təzyiq altında olan iqtisadi bərpa perspektivlərini daha da mürəkkəbləşdirir.
Hökumət 2027-ci ildə 0,9 faiz artım gözlədiyini açıqlasa da, bu ssenari də sabit zəminə söykənmir. Rayxın sözlərinə görə, proqnoz "əhəmiyyətli qeyri-müəyyənlik" fonunda hazırlanıb və nəticə böyük ölçüdə Yaxın Şərqdəki münaqişənin hansı istiqamətdə inkişaf edəcəyindən asılı olacaq.
Bu qərar bir daha göstərir ki, Yaxın Şərqdəki müharibə artıq təkcə regional təhlükəsizlik problemi deyil. Enerji bazarı üzərindən o, Avropanın iqtisadi gündəmini, xüsusən də Almaniya kimi sənaye nəhənglərinin gələcək hesablamalarını birbaşa dəyişdirir. Yəni söhbət sadəcə rəqəmlərin korreksiyasından getmir - söhbət geosiyasi böhranın Avropanın iqtisadi dayanıqlığına vurduğu yeni zərbədən gedir.
visiontv.az
