Hərbi Hava Qüvvələrinin keçmiş din xadimi olan Kollins, 77-23 səs fərqi ilə təsdiqlənib. O, Prezident Donald Trampın Nazirlər Kabinetinə daxil olan ən sonuncu nazirdir.

"Biz uniformadakı cəsur kişi və qadınlarımızın qayğısına qalmalıyıq və Doq bizim hazırda xidmət göstərən hərbi qulluqçularımız üzvlərimiz, veteranlarımız və hərbçi ailələrimizin ehtiyac duyduqları dəstəyə malik olmalarını təmin etmək üçün əla müdafiəçi olacaq," - deyə Tramp noyabrda Kollinsin namizədliyini açıqladığı bəyanatında bildirib.

Veteran İşləri üzrə Departamentin 350 milyard dollarlıq büdcəsi var və ölkə boyu təxminən 200 tibbi mərkəz və hospitala nəzarət edir. Departament həmçinin ölkədəki qəbirstanlıqları idarə edir və kadr məsələlərində Müdafiə Departamenti ilə yaxından əməkdaşlıq edir.

Kollins departament boyu nizamlamaları azaltmağa və veteranlara qayğı keyfiyyətini yüksəltməyə söz verib.

Son illərdə departamentin üzləşdiyi çətinliklər artıb. Belə ki, gənc veteranlar nəsli İraq və Əfqanıstan müharibələrindəki xidmətlərindən sonra yeni sağlamlıq problemləri ilə üzləşiblər.

"Mən İraq Müharibəsi veteranıyam. Tullantıların yandırıldığı yerləri başa düşürəm, çünki aylarla onlardan birinin yanında yatmışam," Kollins yanvarda təsdiqləmə dinləməsi zamanı açılış nitqində deyib. O bildirib ki, "dəfələrlə və təkrar-təkrar" münaqişə zonalarına gedən veteranların bu gün üzləşdiyi çətinlikləri başa düşür.

Kollins 2013-cü ildən 2021-ci ilə qədər Nümayəndələr Palatasında xidmət göstərib. O, Corciya ştatının qanunverici orqanında işlədiyi vaxtdan bəri açıq sözlü mühafizəkar olub və Trampın ilk vəzifə müddətində onun yaxın müttəfiqi olub. O, 2020-ci ildə Senata namizədliyini irəli sürüb, amma Respublikaçılar Partiyasının praymerizində Respublikaçılar Partiyasının böyük donoru olan Kelli Loefflerə məğlub olub. Tramp daha sonra Loeffleri ABŞ-ın Kiçik Biznes Assosiasiyasına rəhbər vəzifəsinə təyin edib.

Şimali Dakotadan olan Respublikaçı senator Kevin Kramer Kollinsi “insanları üzərində işlədiyi işə cəlb edən cəlbedici şəxsiyyətə” malik olan “dost” adlandırıb.

Kollinsin nominasiyası Senatın Veteranlarla İş üzrə Komitəsində 18-1 səs fərqi ilə təsdiqlənib. Onun namizədliyinin əleyhinə təkcə Havaydan olan Demokrat senator Mazie Hirono səs verib və o, Kollinsin veteranların sünu mayalandırma və ya abort kimi reproduktiv tibbi xidmətlərə çıxışını məhdudlaşdıracağından narahat olduğunu bildirib.

İllinoys ştatından Demokrat senator Tammi Dakvort, təsdiq dinləmələri zamanı Kollinslə məhsuldar söhbətinin olduğunu bildirib, ancaq onu "özəlləşdirməyə uz tutmaqdansa" departamenti "gücləndirmək və təkmilləşdirmək" üçün Konqreslə işləyib-işləməyəcəyinə dair suala cavab verməyə çağırıb.

Kollins tibbi xidmət almaq üçün gözləmə müddətlərini həll etməyə və profilaktik xidmətlərin artırılmasına diqqət yetirəcəyini deyib.

visiontv.az