Bütün siyasət Azərbaycanı parçalamağa yönəlib və heç kəs bunu etiraf etmək istəmir
Bütün siyasət Azərbaycanı parçalamağa yönəlib və heç kəs bunu etiraf etmək istəmir
23.09.2021 Azər Rəşidoğlu Tərəfindən

Dərin mövzudur. Çox qısa münasibətimi yazıram. Amulinin bəyanatı ateist və radikal təkfirçiləri birləşdirdi. Təbii ki, bu, əks tərəfin qıcığına səbəb oldu.

Eyni vaxtda   Azərbaycanda etnik problemlər qabardıldı.  İranın müəyyən mənada  təsirinin daha çox olduğu bölgə əhalisini etnik qarşıdurmaya cəhd etdilər və xoşbəxtlikdən buna nail ola bilmədilər. Bütün bu  baş verənlərdə  nə dini, nə də etnik çalar yox idi. Kimlərsə  bunu dini və etnik  savaşa çevirmək istəyirdilər və indi də istəyirlər. Bütün  siyasət  Azərbaycanı parçalamağa yönəlib və sosial şəbəkə qırğılarının qorxusundan heç kəs bunu etiraf etmək istəmir. 

Əslində məsələ sadədir -  İran  öz sərhədləri yaxınlığında, Azərbaycanla NATO üzvü olan Türkiyənin hərbi fəallaşmasını narahatlıqla izləyir.  Tehran uğursuz mövqedədir.  Belə ki, Tehranın müharibənin gedişatına təsir etmək üçün kifayət qədər gücü olmayıb. Rusiya   və Türkiyə (NATO)  hərbçilərinin Cənubi Qafqazda mövcudluğu İranın bölgədəki yenilənmiş "böyük güc yarışmasında" iştirak etmədiyini göstərir.   İran Xəzərdə Qərbin olmasını istəmir, Azərbaycanla sərhədinə NATO-nun nəzarətini arzulamır və Amuli kimilərin əli ilə aranı qatır.  Prezident Əliyevin, onun köməkçisi Hikmət Hacıyevin, Şeyx Allahşükür Paşazadənin bu məsələdə (dolayısı ilə və ya birbaşa) verdikləri açıqlamalar yetərincə düşünülmüş və təqdirə layiqdir. Bu  məsələdə iqtidar – müxalifət ayrımı yoxdur.

Daha bir nüans.  Azərbaycanın tanınmış şiə ruhanilərinin Amuli məsələsinə sərt reaksiya verməməsi də  anlaşılan deyil. Düzdür, vəziyyət daha da  gərginləşə bilərdi.  Lakin nüfuzlu şiə ruhanilərinin  susması başa düşülən deyil. ABŞ-dan  İranla bağlı  xahiş edən insanlar indi ən azı Tehrana eyni məzhəb və dini birliyimizi xatırlatmalı, Azərbaycan şiələrinin narazılığını yumşaq da olsa dilə gətirməli idilər. İran Azərbaycanla heç vaxt strateji müttəfiq olmayacaq.   Sadaladığım amillər və Cənubi Azərbaycan mövzusu Tehranı narahat etməyə bilməz. Azərbaycan düzgün  seçim edib. 

Bakı və  Ankara birlikdə fəaliyyət göstərir. Dünya siyasətinin ən  əsas oyunçusu, ABŞ-in dili və əli olan  London bu əməkdaşlığa müsbət yanaşır və 44 günlük zəfər savaşının pərdəarxası əsas müəlliflərindəndir. Bir  sözlə, etnik və məzhəb savaşı salanların təxribatına uyanlar bir qədər ayıq olsalar yaxşıdır...

Siyasi ekspert Azər Rəşidoğlu

Visionytv.az