Bakı Şəhər Halqasındakı yollar rekord sürətdə təhvil verildi
Bakı Şəhər Halqasındakı yollar rekord sürətdə təhvil verildi
20.06.2022 MEDİA Tərəfindən

Bakı Şəhər Halqasına aid olan küçə və prospektlərdə, Formula 1 azarkeşlərinin və işçi heyətinin təhlükəsizliyinin təmin olunması məqsədilə quraşdırılmış 3500-dən çox beton blok artıq yığışdırılıb.

Bu barədə Visiontv.az-a Bakı Şəhər Halqası Əməliyyat Şirkətinin mətbuat katibi Turab Teymurov  məlumat verib

Onun sözlərinə görə, Formula 1 Azərbaycan Qran Prisinin keçirildiyi son altı ildə, yollar, bir həftə olmaqla ən qısa zaman müddətində bərpa edilərək, nəqliyyatın tam hərəkəti üçün hazır vəziyyətə gətirilib.

“2022–ci il Formula 1 Azərbaycan Qran Prisi ərzində nəqliyyatın hərəkətindəki məhdudiyyətlə əlaqədar göstərdikləri anlayışa görə şəhər sakinlərinə və sürücülərə təşəkkürümüzü bildiririk. Onların rahatlığının təmin olunması və yollardakı gərginliyin minimuma çatdırılması istiqamətində növbəti illərdə də Bakı Şəhər Halqası tərəfindən zəruri addımlar atılacaqdır.” - deyə Bakı Şəhər Halqası Əməliyyat Şirkətinin direktoru Arif Rəhimov bildirib.

Xatırladaq ki, Bakı şəhərinin ev sahibliyi etdiyi 2022–ci il Formula 1 Azərbaycan Qran Prisi 3 gün davam etməklə 10-12 iyun tarixlərində baş tutub.

Orxan Kərimov