“Əmək haqlarının əhəmiyyətli artımı əhalinin alıcılıq qabiliyyətinə müsbət təsir etməklə, iqtisadi aktivliyin daha da artmasına və beləliklə, iqtisadiyyatın digər sferalarına da öz töhfəsini verəcək”. Millət vəkili Tahir Mirkişili bildirir ki, 2018-ildə Prezident İlham Əliyev tərəfindən aparılan islahatlar iqtisadiyyatda şəffavlığın səviyyəsini artırıb, iqtisadi artımın yeni mənbələrinin tapılmasına imkan yaradıb, həmçinin qeyri-neft sektorunun sürətli inkişafı təmin olunub. Bu isə öz növbəsində xeyli vətəndaşımızın maaşının artmasına şərait yaradır.
Qeyd edək ki, əhatə dairəsi 3 milyard manatdan artıq olan sosial islahatlar paketinin mühüm istiqamətlərindən biri də müəlllimlərlə bağlıdır. Belə ki, sərəncam ümumilikdə 160 minə yaxın müəllimi əhatə edir və onların orta aylıq əməkhaqqının 605 manata çatmasına imkan verir. Bu artımın təmin edilməsi üçün dövlət büdcəsindən əlavə olaraq illik 240 milyon manat, bu ilin sentyabr-dekabr ayları üzrə isə 73 milyon manat vəsait ayrılacaq.
Bu ilin əvvəlindən etibarən dövlət başçısı tərəfindən qəbul edilən qərarlar qlobal iqtisadiyyatda baş verən neqativ meyillərin ölkə əhalisinin sosial təminatına mənfi təsirini minimallaşdırmağa imkan vermişdisə, növbəti sərəncamlar əhalinin gəlirlərinin artmasına, yığım imkanlarının genişlənməsinə şərait yaradacaq.