"İran İslam Respublikasında Azərbaycan səfirliyinə edilən terror aktı bunu deməyə əsas verir ki, hazırda informasiya təhlükəsizliyinin qorunması və kiberhücumlardan müdafiə edilməsi sahəsində ciddi tədbirlər görülməlidir".
Visiontv.az Bakutv -yə istinadən xəbər verir ki, bunu Xüsusi Rabitə və İnformasiya Təhlükəsizliyi Dövlət Xidmətinin rəisinin müavini general-mayor Allahverən İsmayılov jurnalistlər açıqlaması zamanı deyib.
O qeyd edib ki, hazırda dünyada gedən ictimai-siyasi proseslərə baxsaq informasiyanın artıq ən böyük təhdidə çevrildiyini görərik:
"Biz informasiya təhlükəsizliyinin qorunması və kiberhücumlardan müdafiə edilməsi sahəsində olan boşluqlar üzərində araşdırma aparmalıyıq".
Xatırladaq ki, yanvarın 27-də Bakı vaxtı ilə səhər saat 8:30 radələrində Azərbaycanın İrandakı səfirliyinə terror hücumu olub. “Kalaşnikov” markalı avtomatla silahlanan şəxs mühafizə postunu yararaq, mühafizə xidmətinin rəisi Orxan Əsgərovu qətlə yetirib, daha iki nəfəri yaralayıb.