Zəngilanın Ağalı kəndində rəsmi qarşılanma,  Zəngəzur dəhlizinin tərkib hissəsi-avtomobil yolunun təməlqoyma mərasimi xüsusi əhəmiyyət kəsb edir. Bu, ilk növbədə  regionda sülhün bərqərar olmasını istəməyən geosiyasi qüvvələrə, eyni zamanda revanş çağırışları səsləndirənlərə verilmiş siyasi mesajdır.

Qubadlının azad olunmasının ildönümü ilə əlaqədar ictimaiyyətlə görüşdə cənab Prezident belə bir ifadə işlətdi. “Müharibədə qurtarsa da, bəzi qüvvələr bizi yenidən döyüşə sürükləmək istəyirlər. Ancaq bilsinlər ki, biz hər zaman hazırıq”

Səfər öncəsi hörmətli Rəcəb Tayyib Ərdoğanın verdiyi bəyanat da “kim, Azərbaycana qarşı təcavüz etmək fikrinə düşsə, qarşısında Türkiyəni görəcəkdir”.

Hər iki dövlət Başçılarının səsləndirdikləri bəyanatlar, hələ də bölgənin təhlükəsizliyinə təhdidlərin olduğunun sübutudur. Bu yaxınlarda sərhədlərimizin yaxınlığında  irimiqyaslı hərbi təlimlər keçirənlərin, erməni ordusunu yenidən silahdırmaq istəyənlərin, Zəngəzur dəhlizinin açılmasına qətiyyətlə maneçilik törədənlərin, timsalında bunu gördük. Türkiyə kimi güclü orduya, hərbi-sənaye kompleksinə malik təbii müttəfiqin hər zaman  yanımızda olması, ölkəmizə yönəlik güclərin balanslaşdırmasına imkan verir.

Yaxın  zamanda İtaliyanın paytaxtı Roma şəhərində G20 sammitində, şübhəsiz region dövlətləri ilə, ələlxüsus, cənub qonşumuzla bağlı müzakirələrin keçiriləcəyi gözlənilir. Sammitdə Türkiyə Prezidentinin ölkəmizin maraqlarını təmsil edəcəyinə, prinsipial məsələlərdə Azərbaycanla birgə hərəkət etməsinə tam əminik. Necə deyərlər, “biz birlikdə güclüyük və qlobal məqsədə doğru addım-addım irəliləyirik”.

Eyni zamanda, işğaldan azad olunmuş ərazilərin minalardan təmizlənməsində, infrastruktur və iqtisadi layihələrin icrasında Türkiyə şirkətlərinin  yaxından iştirakı, əməkdaşlığımızı daha geniş spektrdə stimullaşdırır. Bu gün təməli qoyulan Zəngəzur dəhlizi vasitəsilə, hər iki ölkə arasında, eyni zamanda region dövlətləri, bütövlükdə Şərq-Qərb ölkələri arasında iqtisadi-ticari əlaqələr intensivləşəkdir.

Müasir dünyada Azərbaycan-Türkiyə münasibətləri hər kəsə nümunədir. Elə bir sahə yoxdur ki, ölkələrimiz arasında maraqlar toqquşsun. Bu da heç şübhəsiz, dövlət Başçılarımızın apardığı uzaqgörən, müdrik siyasət, təmsil etdikləri ölkələrin maraqlarını beynəlxalq müstəvidə peşəkarcasına müdafiə etmələri nəticəsində baş verir. Nəticələr isə, göz qabağındadır. Hər iki qardaş ölkənin gücü dünya miqyasında etiraf olunur.

Azərbaycan xalqı 44 günlük müharibədə və ondan sonra tarixinin ən şərəfli günlərini yaşayır.  Hərbi qələbələrdən sonra iqtisadi sahədə, bərpa-quruculuq işlərində əldə olunan hər bir nailiyyət, dövlətimizin gücünü, nələrə qadir olduğunu bütün dünyaya göstərir. Fəxr etmək üçün kifayət qədər əsaslar var.

Millət vəkili Nəsib Məhəməliyev

Visiontv.az