Diplomatik yalan...

02.12.2021 Bəybala Mirzəyev Tərəfindən

Rusiya Xarici İşlər Nazirliyinin sözçüsü Mariya Zaxarova bu gün keçirdiyi brifinqdə Türkiyənin Rusiya ilə Ukrayna arasında vasitəçiliyinə qarşı çıxaraq bildirdi ki, guya Rusiya bu münaqişədə tərəf deyil.

Ancaq M.Zaxarovanın bu açıqlaması səmimiyyətdən və reallıqdan tamamilə uzaqdır. Əslində Zaxarovanın heç özü də uydurduğu bu yalana inanmır.

Tam tərsinə, Rusiya bu münaqişənin iki əsas tərəfindən biridir. "DNR" və "LNR" adlı qondarma "respublika"lar sadəcə Rusiyanın özünün "icad"ıdır və Rusiya adlı qosqoca dövlət bu qondarma dövlətciklərin arxasında gizlənərək illərdi ki, qonşu Ukraynaya qarşı hibrid müharibə aparır. Lazım gələndə isə həmin qondarma "respublika"ları Ukrayna ilə münaqişədə tərəf kimi təqdim etməyə çalışır. Elə M.Zaxarovanın açıqlamasından da bunu sezmək mümkündür.

O, Türkiyənin Donbasdakı vəziyyətlə bağlı Ukrayna ilə Rusiya arasında vasitəçilik etmək təklifinə münasibət bildirərkən deyib ki,
Ukraynanın daxilində olan problemlə bağlı Türkiyənin vasitəçiliyindən söhbət gedə bilməz.

Sitat:

“Rusiya bu münaqişədə tərəf deyil. Artıq bu, Kiyevin Donbasla olan problemidir. Ona görə də, burada Türkiyənin Ukrayna və Rusiya arasında vasitəçiliyindən söhbət gedə bilməz. Bununla belə, biz Türkiyə tərəfinə, xüsusi ilə də prezidentinə təşəkkürümüzü bildiririk. Ancaq Ankara Kiyevi Donbasa qarşı aqressiv fəaliyyət planınından çəkindirə bilər”.

Maraqlıdır ki, özü "Normandiya dördlüyü"nə (Donbasdakı böhranın çözülməsi üzrə Almaniya-Fransa-Rusiya-Ukrayna formatı) tərəf kimi qatılan Moskva nədənsə, Türkiyənin vasitəçilik təklifi ilə çıxış etməsindən sonra münaqişənin tərəfi kimi təqdim edilməkdən boyun qaçırır.

Çünki Türkiyənin vasitəçilik təklifi Rusiyanın geosiyasi maraqlarına uyğun görülmür. Ona görə də, M.Zaxarova belə bir ibarəbazlıqla, söz oyunu ilə həqiqətin üstünü malalamağa çalışıb.

Biraz daha açıq mətnlə desək, bunun adı Türkiyənin təklifindən dolayısı yolla, diplomatik şəkildə imtina etmək deməkdir.

Bəybala Mirzəyev

Visiontv.az